Loan nuai 50 chin la duhte tan sorkar guarantor ah a tang dawn, a pung pawh a tum sak dawn: Lalduhoma, CM

by Editor

Tualchhung News

ZORAM TODAY| 15th August, 2024 (Thur): Vawiin India Independence Day vawi 78-na chu Mizoram hmun hrang hrang-ah a lawmna neih a ni a. A lawmna pui ber Aizawl Lammuala neihah Chief Minister Lalduhoma chu khuallian a ni a, ZPM sorkar a pian hnua sorkar hmalakna leh hlawhtlinna langsar deuhte leh hmathlirte mipuite hriatah a sawi.

Chief Minister Lalduhoma chuan, vawiinah hian sorkar chak, langtlang leh hmasawnna kawnga theihtawp chhuah tura kan intiamna te kha tihhlawhtlin ngei kan tum tih ka sawi nawn leh a. Mipui tana a ṭha ber tur ngaihtuah chungin kan sorkar chuan hna kan thawk chhunzawm zel dawn a ni, a ti.

Kum 2023 December ni 8-a sorkar thar kan din tirh khan Chief Minister’s 100 Days Programme kan puang a, tunah chuan ṭha takin kan tihlawhtling tawh a. He mi hnuaiah hian thlai thlan bik te hlawk zawka hralh a nih theih nana hma la tur Agricultural Market Assurance Fund Management Board (AMAFMB) din chu hmalakna pawimawh tak pakhat a ni. Revised Estimate 2023- 2024 angin Agricultural Market Assurance Fund atan hian Cheng Vaibelchhe 110 dah fel tawh a ni, Chief Minister chuan a ti.

Sorkarin sum uluk taka a hman a, inrenchemna a kalpui theihna tura din Resource Mobilization Committee a din thute, Sorkar Department hrang hrangte chak zawka hna an thawh theihna tur leh an hmalakna hrang hrang thlunzawm theih dan tur enzui turin Mizoram State Policy Coordination Committee din a ni a ti a.

Tin, hmasawnna ruhrel lian tak tak thawh mekte hi sorkar chuan mipui rin ngam hna ṭha leh tlo, a hun taka zawhfel a nih theih an duh avangin Project te endik a, vilzui turin Mizoram State Project Monitoring Committee an din thu a tarlang bawk.

Bul ṭanna tur a sum puk dan awlsam zawk a awm theih nan Mizoram Credit Guarantee Scheme (MzCGS) chu duan fel tawh niin hemi atana thawhpui turin Credit Guarantee Trust of Micro and Small Enterprises (CGTMSE) te nen inremsiamna neih thuai tum a ni, a ti bawk a.

Bana Kaih Program nen a remchan theihna apiangah kalkawptir tum a nih thu leh Targeted Partner zinga sum hlawm puk mamawh te’n awlsam zawka loan an lak theih nan Mizoram Ceiling on Government Guarantees Act 2011 chu siam danglam a ni bawk, a ti a. "He Scheme hnuaiah hian Loan Cheng Nuai 50 chin la duhtute tan Sorkar hi Guarantor-ah a ṭang dawn a, a pung (Interest) pawh Sorkarin a tumsak dawn a ni. Hetiang Scheme hi India ramah a nei awmchhun niin kan inhria," Lalduhoma chuan a ti.

Lunglei ah chuan Thuamluaia Mual ah PWD Minister Vanlalhlana hovin an hmang a, Siaha ah Home Minister K.Sapdanga, Lawngtlai ah Health Minister Lalrinpuii, Serchhip ah LAD Minister C. Lalsawivunga, Mamit ah Forest Minister Lalthansanga, Champhai ah Agriculture Minister PC Vanlalruata, Hnahthial ah Education Minister Dr. Vanlalthlana, Kolasib ah Supply Minister B. Lalchhanzova, Saitual ah bialtu MLA, RD Minister Prof. Lalnilawma, Khawzawl ah Sports Minister Lalnghinglova Hmar te'n Independence Day hi an hmanpui a ni.

N.Vanlaiphai ah chuan All NGO te'n sorkara an thilphut a hlawhtlin loh avangin Independence Day hi an boycott na a, zing vartian ah SDO (Civil) Dr. Peter Malsawmtluanga leh office staff te'n hun an hmang thei a, mipui leh sorkar hnathawk dangte erawh an tel lo a ni.